Contes

Fèlix Arnaudin que hè enqüèra partida deus illustres desbrombats deus diccionaris e de las enciclopedias. Que i a sonque quauques annadas que començam d'autrejà'u la plaça qui deu estar soa e d'aubirar l'importància e l'endom de la soa òbra.

Aqueste libe que presenta ua seleccion deus contes tradicionaus gascons que collectè dens lo parçan de Labohèira enter la fin deu sègle XIX^au e lo començament deu sègle XX^au. La transcripcion en grafia classica que'n hè un apèr particularament adaptat a l'ensenhament. De mei, los contes que son classats en tres categorias : los qui son mei plan adaptats au cicle 1 de l'escòla primària, de 3 a 5 ans, los qui van mei au cicle 2, de 6 a 8 ans, e los qui convienen aus mei grans, de 9 a 11 ans.

Los regents qui participèn ad aquesta edicion qu'espèran que serà lo mejan de har conéisher aus mei joens, e aus auts, ua part importanta deu noste patrimòni.