Entermiei lordèras

Joan Luc que se'n vedó hèra tà anar de la sortida deu parking sosterran tà la libreria. Per tota la passada qui desseparava los dus immòbles deu palai deus Pirenèus (los Paulins qu'aperavan tostemps lo lòc d'aqueth nom, qui vienè de quan ad aqueth endret se quilhava efectivament un palai d'espectacles e d'espòrts), que i avè arabes qui parlavan tròp hòrt, qui cridavan batlèu, e qu'avó a capbaishar afin que los escopits qui hasèn en parlant non l'atenhossen pas. Que i avè tanben dus vagamonds espelagassats asseduts per tèrra a har pròsa - ne'u n'anavan pas au mensh demandar, ne l'anavan pas au mensh hular ? - e un cople de punks qui, arrimats de sengles pialars, e bevèn bièrra - ne l'anavan pas au mensh hular ? - entant qui lo lor can e dromiva, ajacat au ras de l'entrada d'ua pizzeria barrada.