Goude J.-K.

- Ne nac'han ket o doa Tadoù an Iliz amprestet un nebeud neuzennoù prezeg digant an hen skrivagnerion, a respontas Vezirtzís. Bez'e oant padal enebourion touet an desaverezh klasel hag an hen sevenadurezh. [...] Kousiadur an Hellenegezh gant an Iliz a voe ken aketus ken e voe rediet Helleniz da cheñch anv, da vezañ anvet Romeed, Romiz pe Greged. War murlivadurioù 'zo er Menez Santel ez eus derc'hennet e-ser ar sent hag an aeled un nebeud prederourion, Aristoteles, Platon, Sokrates, Pitagoras. An holl anezhe a zoug ur gurunenn, dezhe ur barv hir, ha gwisket int evel priñsed vizantat. Pep hini a zalc'h ur papiruz en e zorn, skrivet warnañ ur frazenn faltaziek oc'h embann, da skouer, anien dreindedel Doue. Gouzout a reer e klaskas an Iliz kevrediñ outi ar furion gozh, ar re n'he doa ket tizhet diskar da nebeutañ, o falsañ o freder. Daoust ha ne vez ket desket ouzhpenn da skolidi an eil derez he deus legadet an Henamzer he sevenadurezh da vBizañs ? Ar gristeniezh, mignon ker, ne gendalc'h ket an Henamzer, dont a ra d'he heul evel ma teu an noz da heul an deiz. An doueoniezh a zinac'h ar brederouriezh. An hini gentañ a respont da bep tra, endra oar an eil goulenn dreist-holl.