Les comtes de Tolose

Comme la pluye ne peut venir mieux à propos qu'en extremité de secheresse, semblablement la misericorde de Dieu ne se trouve plus necessaire & admirable qu'en temps d'extreme tribulation ; ce que nous appert tant par les aages passés & presens, que par la coniecture des futurs. Les aages passés se representent aux yeux par recordation, les presens par oculaire experience, les futurs par presumée providence, laquelle prend fondement des experiences tant passées que presentes. Orest-il que combien que iouxte l'opinion d'Aristote Prince de la secte peripathetique de tous trois temps & aages dessusdits, nous n'ayons ioüissance que du seul present, lequel, comme dit sainct Augustin, est aussi tost passé comme apperceu d'estre present, & presque aussi tost eschappe de nous comme possedé ; si prenons nous du temps passé la plus part des raisons & argumens desquels nous nous preparons au futur pour n'estre surprins d'iceluy. Pour ceste raison experience maistresse de toutes choses nous a monstré & verifié ce que dessus ; c'est que Dieu aux grandes tribulations des hommes a voulu remedier par bon secours : comme il fist environ l'an de grace, DCCXVIII. auquel temps instigant le maling esprit Aygouland Roy Sarrazin Idolarre, commença d'occuper les Espagnes, lesquelles estoient infectées & tachées tant de la secte Payenne que de l'heresie.