Troiad en ifern

Enez ar Gwragez, un ifern ?

He damwelet ho peus marteze a-ziwar an aod e-kerzh unan eus ho kantreadennoù-hañv. Marteze ho peus bet lennet hec'h anv souezhus war ur gartenn. Marteze ez eus deuet ur mousc'hoarzh ganeoc'h o welout he zrolinenn dourvarc'h kofek. Met a dra sur n'eus ket bet un implijad ditourdi evit kanañ meuleudi deoc'h diwar he fenn, pe evit klask gwerzhañ ur bilhed bag deoc'h da gas un devezh warni. Rak, tra sebezus, an holl er c'horn-bro a dro kein dezhi, an holl a ra e-giz pa ne vije ket anezhi, hag hi koulskoude war-hed nebeut eus an douar bras. Un eurvezh treizh d'an hirañ pa vez plaen ar mor.